Menota T V B Tekst- og verktøybase for Medieval Nordic Text Archive Kodingsstandard, ordbankbygging og Heimskringla-edisjon Arbeidsmøte i Oslo, 7. februar 2003 Deltakarar: Bjørn Eithun (Gammalnorsk ordboksverk, Oslo), Odd Einar Haugen (Menota-prosjektet, HIT-senteret i Bergen), Christian-Emil Ore (Menota-prosjektet, DOK-gruppa i Oslo) og Erik Simensen (Gammalnorsk ordboksverk, Oslo). Møtestad: Institutt for nordistikk og litteraturvitskap, Blindern, Universitetet i Oslo. Tidspunkt: kl. 13.00-16.00. Referatet er skrive av Odd Einar Haugen. Det er ikkje stenografisk, men tek sikte på å oppsummere dei viktigaste avgjerdene på møtet.   1 Gjennomgang av tilgjengeleg materiale I samarbeid med Dokumentasjonsprosjektet har Gammalnorsk ordboksverk digitalisert eit stort gammalnorsk tekstmateriale. Dette omfattar dels reine transkripsjonar og dels eit stort setelarkiv med full lemmatisering og grammatisk koding av tekstene: Digitalisert tekstmateriale Setelarkiv Dette materialet er førebels ikkje allment tilgjengeleg, men Gammalnorsk ordboksverk er innstilt på at det skal gjerast tilgjengeleg til forskingsføremål. Det står enno tilbake ein del korrektur- og kontrollarbeid før tekstene kan leggjast ut. Under drøftingane på møtet var det semje om at ein måtte nå fram til realistiske og fornuftig kvalitetsmål, og at ein ikkje måtte stille kravet så høgt at materialet vart liggjande utilgjengeleg i lengre tid. I tillegg til det nemnde materialet finst det nokre tekster, der rettane kviler hos Magnus Rindal: - Barlaams ok Josaphats saga (Holm perg 6 fol.) - Magnus Lagabøtes landslov (AM 309 fol.)   2 Klargjering av forholdet mellom Gammalnorsk ordboksverk og Menota-prosjektet Gammalnorsk ordboksverk er i utgangspunktet positivt innstilt til at det digitaliserte materialet kan gjerast tilgjengeleg via Menota, Medieval Nordic Text Archive. Vilkåret for at dette kan skje, er at det blir utarbeidd ein avtale mellom Gammalnorsk ordboksverk og Menota-prosjektet som heilt ut tek vare på dei rettar som Gammalnorsk ordboksverk har til materialet, og som vidare inneber at materialet blir distribuert på ein slik måte at det blir gjeven full kreditt til det arbeidet som Gammalnorsk ordboksverk har lagt ned i det. Menota-prosjektet utarbeider utkast til ein slik avtale innan utgangen av første kvartal 2003. Deretter vil avtalen bli drøfta mellom dei relevante partane. Menota-prosjektet utarbeider vidare eit framlegg til brukargrensesnitt for utlegging av tekstmateriale med spesifikasjon av bruksvilkår og opphavsrettar.   3 Framdrift og finansiering av kontroll- og korrekturarbeidet Gammalnorsk ordboksverk tek sikte på å utarbeide ein framdriftsplan for kontroll- og korrekturarbeidet, og undersøkjer om det finst kvalifisert personale tilgjengeleg for timelønt assistanse. Christian-Emil Ore opplyste at DOK-gruppa kan stille lønsmidlar til disposisjon for dette arbeidet.   4 Avtale om intern bruk av materialet i Menota-prosjektet Gammalnorsk ordboksverk gir Menota-prosjektet løyve til å studere det digitaliserte tekstmaterialet og prøve ut teknikkar for formidling og vising av dette. Denne avtalen gjeld berre intern bruk i prosjektet, dvs. av dei medarbeidarane som er oppførte under prosjektet Menota TVB: http://helmer.hit.uib.no/menota/TVB/ Dette skjer i praksis ved at Menota-prosjektet får tilgang til det digitaliserte tekstmaterialet som no ligg i FileMaker-format. Oppretta 18.02.2003. Sist oppdatert 06.03.2003.